એક લખું છું કરુણ કહાની – ગુજરાતી સંતવાણી ભજન
EK LAKHU CHHU KARUN KAHANI – BEST GUJARATI BHAJN
રચનાઃ કવિ કાન
એક લખું છું કરુણ કહાની, આંસુ આખલડી માં આણી….. આંસુ આખલડીમાં
સુંદર તટની હતી સરિતા જ્યાં વહેતા ખળખળ પાણી,
જુગલ વસે ત્યાં ખગની જોડી, સારસ સારસી રાણી…. આંસુ આંખલડી માં
પંખી બંનેને પ્રેમ ઘણેરો, એની વર્ણવી શકે ન વાણી,
દેહ જુદા એનો જીવડો એક છે, જેમ વેલ તરુને વિટાણી…. આંસુ આંખલડી માં
માદા હતી તેને ઈંડા મૂક્યા અને હૈયે બહુ હરખાણી,
પંખી ઉડ્યો એના પોષણ કાજે ઉરમાં શાંતિ આણી આંસુ આખલડી માં
ચારો લઈને સારસ ચાલ્યો, ત્યાં મોતની નાળ મંડાણી,
પારાધીએ એક તીર ફેંક્યું, ત્યાં ચિસકારી સંભળાણી…. આંસુ આંખલડી માં
કકળી ઊઠી ત્યારે કામિની, હૃદયની ગતિ રૂંધાણી,
પીયુ પીયુ એવા કર્યા પોકારો,ત્યાં તો એની આતમ જ્યોત ઓલાણી…. આંસુ આખલડી માં
કઠણ હૃદયની કેવી વિધાતા, એની કલમ કાં ન અટકાણી,
‘ કાન’ કહે ઓલા ઈંડા નું શું થયું હશે એની કથી શકું ન કહાની…. આંસુ આંખલડી માં…