હા રે વ્હાલા દ્વારીકાના વાસી- ભજન સંતવાણી
HA RE VHALA DWARIKA NA VASI – PRABHATIYU – SANTVANI BHAJAN
રચનાઃ ભક્ત કવિ નરસિંહ મહેતા
હા રે વ્હાલા દ્વારિકાના વાસી વહેલા આવજો,
તમો રાણી રૂક્ષ્મણી કેરા કંથ,
દુષ્ટ દુર્યોધન રે પાપી લાગ્યો પીડવા,
ચૌદિશ નિહાળુ તારો પંથ……..
સોડ વાળીને રે શું સૂતો શામળા,
આળશ તજીને ઉઠો આજ,
લક્ષ્મીજી તલાશે રે પ્રભુ તારા પાવમા,
વાલા તમો મહેર કરો મહારાજ…..
ગ્રાહ મુખમાંથી રે ગજને મુકાવ્યો,
કીધી એમ સુધન્વાની સહાય,
નૃસિંહ રૂપે રે હિરણાકંસ માર્યો,
વહાલે ઉગાર્યો ભક્ત પ્રહલાદ…..
છપ્પન કોટી રે યાદવો તારા રે,
સંગે બલભદ્ર સરખા ભ્રાત,
કાળી નાગ નાથિયો ને જરાસંધ જીત્યો,
તે બળ ક્યાં ગયું મહારાજ…..
ધ્રુવને પ્રહલાદે રે ગર્ભમાં તપ કીધા,
તેને વાલે આપ્યા અવિચલ રાજ,
સાત વર્ષમાં રે હરિએ ગોવર્ધન કર ધર્યો,
પુર્યા વ્રજ વનિતાના લાડ…….
વસમી વેળાએ વારે ચઢજો વિઠ્ઠલા,
થાજો તમે છત્રપતિ મહારાજ,
અસવારી કરજો રે વાલા મારા ગરૂડની,
નરસૈયા વિનવે વારંવાર…….