આભમાં ઉગેલ ચાંદલો ને,
જીજાબાઈને આવ્યા બાળ રે,
બાલુડા ને માત હીંચોળે,
ધણણણ ડુંગરા ડોલે,
માતાજી જાબાઈ ઝુલાવે, શિવાજીને નીંદરુ ના’વે….. ટેક
પેટમાં પોઢીને સાંભળેલી બાળે,
રામ લક્ષ્મણ ની વાત રે,
શિવા રામ લક્ષ્મણ ની વાત,
માતાજીના મુખ જેદીથી,
ઉડી એની ઊંઘ તેદીથી…. માતા જીજાબાઈ
ઘુઘરા ધાવણી પોપટ લાકડી,
ફેરવી લેજે આજ રે,
શિવા ફેરવી લેજે આજ,
કાલે તારે હાથ રેવાની,
રાતી બંબોળ ભવાની…. માતા જીજાબાઈ
ધાવજો રે મારા પેટ ધાવી લેજો,
ખૂબ ધપીને આજ રે,
શિવા ખૂબ ધપીને આજ,
રહેશે નહીં રણ ઘેલુડા,
ખાવા મુઠ્ઠી ધાનની વેળા…. માતા જીજાબાઇ
આજ માતા ચોડે ચૂમીયો રે,
તમે ઝીલજો બેવડ ગાલ રે,
શિવા ઝીલજો બેવડ ગાલ,
કાલે તારા માથડા માથે,
ધુવાધાર તોપ મંડાશે…. માતા જીજાબાઈ
આજ માતાજીની ગોદમાં તુને,
હુંફ આવે આઠ પોર રે,
શિવા હુંફ આવે આઠ પોર,
કાલે કાળી મેઘલી રાતે,
વાયુ તારા મોતના વાસે…. માતા જીજાબાઈ
આજ માતા તારી પાથરી દેતી,
કુણા ફુલડા કેરી સેજ રે,
શિવા ફુલડા કેરી સેજ રે,
તેદી તારી વીર પથારી,
પાથરશે વીસ ભુજાળી…. માતા જીજાબાઈ
આજ માતાજીના ખોળલે રે,
તારા માથડા ઝોલે જાય રે,
શિવા માથડા ઝોલે જાય,
તે દી તારે શિર ઓશીકા,
મેલાશે તીર બંધુકા…. માતા જીજાબાઈ
ઊંઘી લેજે તું ઊંઘી લે મારા,
કેસર ભીના બાળ રે,
શિવા કેસર ભીના બાળ,
જાગી વેલો આવજે વીરા,
ટીપુમાં લોહીનું લેવા…. માતા જીજાબાઈ….
કાનુડો શું જાણે મારી પ્રીત - મીરાબાઇનું ભજન કાનુડો શું જાણે મારી પ્રીત, બાયું અમે…
આપણાં પિયુજી કેરો દેશ - AAPANA PIYUJI KERO DESH આપણાં પિયુજી કેરો દેશ હેલી રે…
શ્રી રામચંદ્ર કૃપાલુ ભજમન - SHREE RAMCHANDRA KRUPALU BHAJA શ્રી રામચંદ્ર કૃપાલુ ભજમન, હરણ ભવભય…
કાયા તો ધૂતારાનાં શહેર છે - KAYA TO DHUTARO NA કાયા તો ધૂતારાનાં શહેર છે…
આશિક જો મસ્ત ફકીરી કે - ગુજરાતી ભજન આશિક જો મસ્ત ફકીરી કે દુનિયા સે…
અલખ મીલન કે કાજ - ભજન અલખ મીલન કે કાજ ફકીરી, લેકે ફિરું મૈં જંગલ…