ગોરી તારે ત્રાજવડે રે મોહ્યા મુનિવર – સંતવાણી ગીત
GORI TARE TRAJVADE RE – SANTVANI SONG GUJARATI
રચનાઃનરસિંહ મહેતા
ગોરી તારે ત્રાજવડે રે, મોહ્યા મોહ્યા મુનિવર રાયા રે,
રૂપ સ્વરૂપ કળ્યું નવ જાયે,કોઇ દીસે છે ઇશ્વરી માયા રે …..ટેક
રૂમઝૂમ રૂમઝૂમ નેપુર બાજે,ગોફણે ઘુઘરી ઘમકે રે,
શીશ દામણી એણી પેર સોહે,જેમ ગગન વીજળી ચમકે રે …..ગોરી તારે …
નિલવટ આડ કરી કેસરની,માંહે મૃગમદની ટીલી રે,
આંખલડી જાણે પાંખલડી,હિડે લીલાએ લાડગહેલી રે ….. ગોરી તારે …..
આ કંચવો તમે ક્યાં સિવડાવ્યો,શણગટ વાળ્યો શું ધારી રે ?,
આ વેણી તમે ક્યાં રે ગૂંથાવી,જેણે મોહી વ્રજની નારી રે …… ગોરી તારે ……
ચંચલ દ્રષ્ટ્રી ચહુદિશ નિહાળે,માંહે મદનનો ચાળો રે,
નરસૈયાનો સ્વામી જોવા સરખો,કોઇએ સુંદરીનું વદન નિહાળો રે …..ગોરી તારે …..