ગુજરાતી સંતવાણી-કહે સહદેવ અમે નહીં રહિયે – SANTO NA BHAJANO
ભજન -દેશી ભજન-કહે સહદેવ અમે નહીં રહિયે પાંડવો…..ગુજરાતી સંતવાણી
કહે સહદેવ અમે નહીં રહિયે પાંડવો,
ઐસા કળિયુગ આવેગા
જે ઠેકાણે મારો હંસો રાજા બેસતા,
ત્યાં બગલા આસન વાળેગા…કહે સહદેવ અમે…..(1)
એ સોનાની થાળમાં બ્રાહ્મણો જમતા,
દીધા દાન ન લેતા,
આજના બ્રાહ્મણો ઘેર ઘેર ભટકે,
ઇ ભિક્ષા માંગી લાવેગા…કહે સહદેવ અમે…..(2)
એ બ્રાહ્મણોને વાણિયા ધાડું પાડશે,
ઓલા બાવા દુકાનું માંડેગા,
અધરમીના ઘરે તુલસીનો ક્યારો,
ઉચ્ચ વરણ વહાં જાયેગા…કહે સહદેવ અમે…(3)
એ સકળની નારીયું લાજું લોપશે,
ઓલી ગુણીકા ઘૂંઘટ તાણીગા,
દીકરીના પૈસે પિતા પરણશે,
ઐસા કલયુગ આવેગા….કહે સહદેવ અમે…..(4)
બેટો બાપના કહ્યા કરે નહીં,
ઇ પુત્ર પરણાવી ઘર આવેગા,
પરણાવ્યા પછી ઇ તો પાંચમે દાડે,
વહુને વચને ચાલેગા…..કહે સહદેવ અમે…..(5)
પાંચ પાંડવ માતા કુંતાના ઇતો,
હાડ હેમાળે ગાળેગા,
સહદેવ જોષીએ આગમ ભાખ્યા,
જીવેગા ઇ જોવેગા…કહે સહદેવ અમે…..(6)
કહે સહદેવ અમે નહીં રહિયે પાંડવો,
ઐસા કળિયુગ આવેગા
જે ઠેકાણે મારો હંસો રાજા બેસતા,
ત્યાં બગલા આસન વાળેગા…કહે સહદેવ અમે…..