NANU SARAKHU GOKULIYU – BHAJAN PAD
નાનું સરખું ગોકુળિયું મારે – સંતવાણી ભજન
રચનાઃ નરસિંહ મહેતા
નાનું સરખું ગોકુળીયું મારે વ્હાલે વૈકુંઠ કીધુ રે,
ભક્તજનોને લાડ લડાવી ગોપીઓને સુખ દીધું રે….
ખટ દર્શનને ખોળ્યો ન લાધે, મુનિજન ને ધ્યાન ના આવે રે,
છાશ વલોવે નંદ ઘેર વ્હાલો, વૃંદાવન ધેનુ ચરાવે રે…..
વણ કીધે વ્હાલો વાતાં કરે, પૂરણ બ્રહ્મ અવિનાશી રે,
માખણ કાજ મહિયારી આગળ, ઊભો વદન વિકારી રે……
બ્રહ્માદિક જેનો પાર ન પામે, શંકર કરે ખવાસી રે,
નરસૈંયાનો સ્વામી ભક્ત તણે વશ, મુક્તિ સરીખી દાસી રે