RAKHO LAJ HAMARI – GUJARATI BHAJAN
પ્રાચીન ભજન -રાખો લાજ હમારી………
રચનાઃ નારાયણ સ્વામી
નોધારાના આધાર આપ છો, સુધબુધ દેજો સારી,
રાખો લાજ હમારી બાપા રાખો લાજ હમારી….ટેક
અનેક જન્મોના અમે અપરાધી,સુરતા દેજો સુધારી,
બાંય પકડી બજરંગ બાપા, એ જી અમને લેજો ઉગારી…રાખો લાજ
મમતા મારી કેમે મરી નહીં,રાગ દ્વેષમાં રાજી,
હરી સમરણમાં હેત ન ઉપજે, એ જી પરમારથમાં પાજી….રાખો લાજ
ઇર્ષ્યામાં તો સહુથી આગે,દુઃખ દીયે છે ભારી,
અંતઃકરણમાં આપ બિરાજીને,કાઢજો એને બારી….રાખો લાજ
બગદાણા આવીને બેસું,ત્યારે કાંઇક મળે હયારી,
બજરંગ બાપા ત્યાં બિરાજે,અલખ પુરૂષ અવતારી…રાખો લાજ
અનેક જીવોનો ઉદ્દાર કરવા,કૃપા કરો જગમાંઇ,
દયા કરી દયારામજી ઉપર,એ જી નાથ નિવાજ્યા નિજારી….રાખો લાજ
બગદાણેથી બંડી મળી, જેના ખીચામાં ખલક સારી,
દ્વારકામાં ડંકો દીધો,એ જી ભક્તોના હિતકારી…..રાખો લાજ
રોમે રોમે જેને રણકાર છે એ રામ નામનો ભારી,
નારાયણ નિરખે નયનોથી,બાપા બજરંગની બલિહારી…..રાખો લાજ