KALIYUG MA JATI SATI SANTASHE…….GUJARATI BHAJAN LYRICS
કળિયુગમાં જતી સતી સંતાશે….ભજન સંગ્રહ
રચનાઃ ગંગાસતી
કળિયુગમાં જતી સતી સંતાશે
ને કરશે એકાંતમાં વાસ
કુડાને કપટી ગુરૂને ચેલા,
પરસ્પર નહી વિશ્વાસ…કળિયુગમાં જતી…(1)
ગુણી ગુરૂને ચતુર ચેલો પણ,
બેયમાં ચાલશે તાણાવાણ,
ગુરૂ અવગુણ ગોતવા માંડશે,
ને ગાદીના ચાલશે ઘમાસાણ…કળીયુગમાં જતી…(2)
ચેલકો બીજા ચેલા પર મોહશે,
ને પોતે ગુરૂજી થઇને બેસે,
ગુરૂની દિક્ષા લઇ શિક્ષા ન માને,
જ્ઞાન કે ગમ નહીં લેશે…..કળિયુગમાં જતી….(3)
ચેલો ચેલા કરી કંઠીઓ બાંધશે,
ને બોધમાં કરશે બકવાદ,
પેટને પોષવા ભીખીને ખાશે,
ને પુરૂષાર્થમાં પરમાદ….કળિયુગમાં જતી….(4)
ધનને હરવા છળ કરશે,
ને નિતનવા ગોતશે લાગ,
આસન ઉથાપી કરશે ઉતારા,
ને વિષયમાં એને અનુરાગ….કળિયુગમાં જતી….(5)
વાદ વિવાદને ધરમ કરમમાં,
ચુકશે નહીં કરતાં એ હાણ,
ગંગાસતી કહે એવાથી ચેતજો,
કલજુગના જાણી પરમાણ….કળિયુગમાં જતી…..(6)
કળિયુગમાં જતી સતી સંતાશે
ને કરશે એકાંતમાં વાસ
કુડાને કપટી ગુરૂને ચેલા,
પરસ્પર નહી વિશ્વાસ…કળિયુગમાં જતી…