દાદભાના દુહાઓ – લોકસાહિત્યનાં સથવારે – દુહા છંદ
DADBHA NA DUHA – GUJARATI DUHA LYRICS
રચનાઃ કવિશ્રી દાદભા ગઢવી
માયા ને મમતા તણા, જેને રુદે લાગ્યા ન રોગ,
ઈ સંત સમરવા જોગ, દિવસ ઉગતાં દાદભા.
નીંભાડેથી નિકળે, રણકે રીઢાં હોય,
કાંસા જાણીને કોઈ, દોણાં વોરે ન દાદભા.
જગ ઊથડકી જાય, (જેનાં) ઠરેલ મન થડકે નહીં,
( એવા )અણડગ અવનિમાંય, દીઠ્યા થોડા દાદભા.
ગાળિયેથી છૂટી ગયું, વાંભ્યું ઢોર વળે,
એક માનવ નવ મળે, દ્રશ્યું ઓળાંડેલ દાદભા.
જશભાગીની જગતમાં, વહમાયું વેઠાય,
ખરિયું નવ ખમાય, દોણે પાકડાની દાદભા.
નીર ખીર નોખાં રીતે,મથ્યે ન માખણ થાય,
( તોઇ) ફોદરડા કે ‘વાય, દહીં ન કહેવાય દાદભા.
તેતરડાં જેમ તરફડે (જેનું) ચપટી વાગતાં ચિત્ત,
એને રણશૂરાની રીત, શીખવવી કેમ શામળા !
પાદરથી પાછા વળે, સીમાડે જ સંતાય,
એવા જાણ્યે કદી ન જાય, દુઃખની વેળા દાદભા.
ચકડોળે ઉપર ચડ્યાં, વાયેં વીફરિયાં,
કોઈએ નવ કરિયાં, દિલના સંગી દાદભા.
રામે સોંપેલ રાજ, ભરતને ભોગવવા,
પણ ચાખડિયુંથી સ્વાદ, દેખ્યો ન ઝાઝો દાદભા.