LILI VADI RAKHANHAR RE – AAI SONBAI MA NU BHAJAN
લીલી વાડીની રાખણહાર રે – સોનબાઇમાંનું ભજન
રચનાઃકાળુભા ગઢવી
લીલી વાડી ની રાખણહાર રે,
સોનબાઇ સોરઠ વાળી,
ચારણ કુળની તું તારણહાર રે,
માત વડી મઢવાળી….. ટેક
તોળા નામ તણો પરતાપ,
દુઃખનો ડુંગર ટળિયો,
જ્યારે જ્યારે મેં દીધો તને સાદ,
હોંકારો તોળો સામો મળ્યો…. લીલી વાડીની….
દોડી-દોડીને થાક્યો બાળ,
અંતમાં તો શરણું તારું,
ભાવે રાખે છોરૂની ભાળ,
મનડું તોળું માયા વાળું….. લીલી વાડીની…
આઈ સાધુ કાશીને હરિદ્વાર,
કેમ કરી પાવન થાવું,
તું છો ગંગા તણો અવતાર,
મઢડે માં હું આવી જાવું….. લીલી વાડીની…
તોળું સમરણ ન છેટુ થાય,
શ્વાસ ભલે છેટો થાવે,
આવે આતમ પણ મઢડા માંય,
કહો ને બીજે ક્યાંય જવું….. લીલી વાડીની…..
માળા તૂટે નહીં તોળો તાર,
સ્નેહીથી સંભાળી લેજે ,
આઈ લે ને પાછો તું અવતાર,
અરજ એવી કાળુ કે છે…… લીલી વાડીની